Раўаж ОТАРБАЕВ

ҚАРАҚАЛПАҚТЫⱧ

Тандырында пискен ыссы нанындай,
Тамырында аққан таза қанындай,
Қол узатса, жазық алақанындай,
Мийрим, муҳаббаты Қарақалпақтың.

Бахты бәлент, жулдыз жанар көгинде,
Түп-туўысқан еллер дөгерегинде,
Мынаў кең дүньяның бир бөлегинде,
Бәлент имараты Қарақалпақтың.

Қобызында, ғаз сестиндей намасы,
Дуўтарында, жан дүньясы сазасы,
Шыңқобызда, қызларының “Муза”сы,
Шадлық, салтанаты Қарақалпақтың.

Қалмас орынланбай, айтылған лебиз,
Мәртлик, сақыйлыққа жаралған егиз,
Руўхы шөкпеген, шөкседе теңиз,
Таўдай матанаты Қарақалпақтың.

Алғыр қыран, батыр бол дер улына,
Шерик бол дер елдиң, бахыт,муңына,
Дақ түсирмеў, ел атына, туўына,
Уллы аманаты Қарақалпақтың.

Интернет ҳаққында

Бул тармақтың шеңбери кең,
Ҳәр минуты әсирге тең,
Кириссеңиз түринип жең,
Илим - билим кәни де бар.

Инсанға керек ақыл ес,
Айтар жети өлшеп бир кес,
Таңласаңыз шын пикирлес,
Сөзлеринде мәни де бар.

Ким керегин таўып атқан,
Ким дәрегин таўып атқан,
Базда ийттей қаўып атқан,
Жақсы - жаман кәри де бар.

Ерси көрмең сөзлеримди,
Сынап көриң өзлериңди,
Лекин, ашың көзлериңди,
Сергек болар жерлери бар.

Ашықлық

Мәжнун талға таянады,
Ашық кеўлин жазарында.
Муҳаббатқа таянады,
Шайыр қосық жазарында.

Көре берер, ғаўғалы бас,
Азабын да, ҳазарын да.
Жоқдур ҳеш ўақ тәрези-тас,
Муҳаббаттың базарында.

Тумлы-тусқа шабар ашық,
Билмес кимнен озарында,
Күйер жүрек ара қашық,
Ада болып дозағында.

АТА МИЙРАС, ҚОСЫҚ САЗЫМСАҢ ЎАТАН

Пайызлы күн, қайырлы ҳәр түниң бар,
Қуяш күлип, ақшам жулдыз жымыңлар,
Таллар арасынан самал сыбырлар,
Қәлбимде жаңлаған сазымсаң ўатан.

Көк майсалар, таңғы шықтан нәр алып,
Қушағыңда, әлўан гүллер ырғалып,
Сейилге атланған, қыздай салланып,
Қәлбимде жайнаған, жазымсаң ўатан.

Қуяш сүйген, жемислериң мазалы,
Жанға ләззет, ылай суўдың сазаны,
Бирликте қайнаған елдиң қазаны,
Мақтанышым, ығбал-бахтымсаң ўатан.

Дала яңлы, халқымның кең пейли бар,
Дана яңлы, ул-қызының зейни бар,
Байрам-тойға, жарасықлы сейли бар,
Ата мийрас, қосық сазымсаң ўатан.

09.08.2023

ҲАРМАҢ, ТАХТАКӨПИР АЗАМАТЛАРЫ

Ўатан қушағында саўлатлы бир ел,
Шақырып турғандай шайыр бери кел,
Мени ийтермелер қәлбимде бир жел,
Ҳармаң, Тахтакөпир азаматлары.

Қонақ келсе, қут келди деп қуўанар,
Үлкен-киши, хызмет етип жумалар,
Дуўтар, домбырада жаңлар намалар,
Сазгер, Тахтакөпир азаматлары.

Тандыр, қазан ошақ, ғыжлап тур шоғы,
Тандырда шоқ болса, кеўилдиң тоғы,
Сөз деген, атылған кәманның оғы,
Шешен, Тахтакөпир азаматлары.

Кетседе созылып қыстың қәҳәри,
Қар, қыраў жарасқан сулыў шәҳәри,
Көзинде, жүзинде, жасар бәҳәри,
Жомарт, Тахтакөпир азаматлары.

Қаратерең, Бөршитаўдың жағасы,
Кеўлиң нама шертсе, илҳам сағасы,
Бири ини болса, бири ағасы,
Бир муш Тахтакөпир азаматлары.

Раўаж Отарбаев.
04.03.2025.

УЛЛЫЛАР ИШИНДЕ УЛЛЫСАҢ ҲАЯЛ

Сизлер абат еткен үйди даланы,
Сизлер абат еткен аўыл қаланы,
Бәрше дәўирлердиң уллы адамы,
Уллылар ишинде уллысаң, ҳаял.

Тарларға жарасқан сулыў намасыз,
Қәлби ҳикметлерге толы данасыз,
Апа, сиңли, опалы яр, анасыз,
Уллылар ишинде уллысаң, ҳаял.

Он бармағың өнер ушын жаралған,
Қәлбиңизден меҳир нуры таралған,
Қәдирдан, муқәддес, азиз саналған,
Уллылар ишинде уллысаң ҳаял.

Гөззаллық таралар сезимлериңнен,
Шаңарақ, журт абат төзимлериңнен,
Бул қосық гүлдәсте кеўил төримнен,
Уллылар ишинде уллысаң ҳаял.

Раўаж Отарбаев

Ассалаўма әлейкум!
Қәдирдан дөретиўшилик каналым ағзалары болған апа-қарындаслар, жеңгелер менен келинлер, кәсиплеслер менен заманлас досларым!

Сизлердиң ҳәр бириңизди, сизлер ушын қәдирли болған Халық-аралық ҳаял-қызлар күни байрамыңыз бенен шын кеўилден қутлықлайман!
Ҳәр бириңизге беккем ден-саўлық, узақ мазмунлы, бахытлы өмир, мол ырысқы-несийбе тилеймен!
Шаңарақта ҳәм жәмийетимиз турмысында орныңыз ҳәмийше гиреўли.
Және бир мәртебе байрамларыңыз қутлы мүбәрек болсын!

Ышқы сыры

Жүрекке түскен жалын,
Өртейди ҳәрне барын.
Басынан өтпегенлер,
Түсинбес ашық зарын.

Суў киби жутып болмас,
Қол менен тутып болмас,
Муҳаббат- татлы сезим,
Пул менен утып болмас.

Жүректе-суйгениң шын,
Ышқында куйгениң шын,
Жоғалтсаң өз бахтыңды,
Әрманлар түйгениң шын.