Азимбек Утемуратов қосықлары

Арзыўларың недур қоян тутқан қыз,
Бизиң ақыл жетпес бундай ышқыңа,
Бәлент минберлерде лап айтқанда биз,
Сен рас сөйлер едиң ойыншығыңа...

-Саған қәлем керек, саған гүл керек,
Билген қуўанышың, әрманың усы.
Бизге әлем керек, бизге пул керек,
-Усы үлкенлердиң зәрүр жумысы...

***
Орзуларинг недур қуён тутган қиз,
Бизнинг ақл етмас бу қучоғингга,
Баланд минбарларда лоф айтганда биз,
Сен рост сўзлар эдинг қўғирчоғинга...

-Сенга қалам керак, сенга гул керак,
Шунда мужассамдир қувончинг бари.
Бизга олам керак, бизга пул керак,
-Шудир катталарнинг муҳим ишлари...

Азимбек Утемуратов

Ана Ўатанымыз- Қарақалпақстан Республикасының байрағы ҳәм Ғәрезсизлик декларациясы қабыл етилген күн, яғный, халық байрамы менен бәршеңизди қутлықлайман!

Ертеңги күнниң ийелери- әдил ҳәм билимли перзентлер! ЕЛИМИЗДЕ ӨЗ ПИКИРИН ҚОРҚПАЙ АЙТА АЛАТУҒЫН, ӨЗ ҲУҚУҚЫН ТАЛАП ЕТЕ АЛАТУҒЫН, САНАЛЫ ЖАСЛАР КӨБЕЙЕ БЕРГЕЙ!

Информацион соққыларға, бузғыншы идеяларға алданбай, билим алыўда, саўатлы, ақыллы кадрларды көбейтиўде даўам етиў керек!
Мен 18 жасымда : "Өзбекистан Республикасына хызмет етемен",-деп ант ишкен болсам да, миллетим өзбек болса да, адамгершилик, Ана Ўатанға садықлық жағынан Қарақалпақстанның ығбалын ҳәм гүллениўин шын жүректен қәлеймен. Ҳүкимет келип кетиўши, ал Ўатан бир дана! Алладан Қарақалпақстанға тынышлық-аманлық тилеймен!
ЖӘНЕ БИР МӘРТЕ, БАЙРАМЫҢЫЗ ҚУТЛЫ БОЛСЫН, ӘЗИЙЗЛЕР!

Неге енди қол түсирип, муңайыў қажет?
Ҳәўес етсек, буйырса көрермиз бәрин!
Кимдур налыныўды қылғанда әдет,
Космосқа шыққан-ғо Юрий Гагарин?!

Әл ҳаўада қалқыған жердиң үстинде,
Жүргендеймиз гүрсингенше, қайғыда,
Бир заманлар Нил Олден Армстронг,
Барып көрмеди ме алыс айды да?!

Билгеним: космонавт, шайыр я устаң,
Бәри адам баласы- алым, дийханың,
Ҳешким туўылмады әўели бастан,
Шебер маманы боп галактиканың...

Бирақ парызыңды аңла, Азимбек,
Дүнья жеткермейди шапқаның менен,
Арзыў-әрманыңа қоялмайсаң шек,
Аспанның ақырын тапқаның менен!

Азимбек Утемуратов

Джо Дассенниң "Егер сен болмағанда" қосығын есите турып, бир нәрсе жазғым келди...

Бала гезимде мен ҳәм көпшилик балалар киби дүньяда тек жақсы адамлар бар деп ойлар едим. Жер жүзинде өмир бар екен, жақсы бар, жаман бар, ал қараңғы түн изинен жақты күн келеди. Булардың бәри өзгермес қағыйда. Ялғаншыда ҳәрким, ҳәр нәрсе өз орынына ийе. Бизден, тек ғана, аспандағы ямаса жердеги нәрселерди қойып, ишимиздеги Аллаҳымызға исенип жасаўымыз талап етиледи.

Керегинен артық тырысыў жетискенликтиң жолына тосық болады дегендей, базыда бәрин тәбиятқа қалдырыў керек. Он сегиз мың әлемди басқарып турған Аллатала бәрине шебер!

Күлип, жақынларымызға мийрим берип, жақсылық сыйлап жасайық, әзийзлер!

Ҳүрмет пенен, Азимбек Рустамович.

Үйренип алғанман қосық жазыўды,
Бәлким жигирма жыл... оннан артығырақ,
Сол балалық ўақтағы таза арзыўды,
Алыстан болса да көремен, бирақ...

Сен деп нан дегенмен, ана дегенмен,
Сүт дегенмен, сенде баўырсақ, торақ,
Ҳәтте түнде айды үзип жегенмен,
Жулдыздан тапқанда шөмиш ҳәм орақ.

Топырақтан гүл өнсе, қуўанып тағы,
Сол жерде жүрип-ем үпелек санап,
"Қойма, қошқарма?"ны ымлаған ўағы,
Көп нәрсе билгенмен, апамнан сорап.

Мойнаққа барғанда билдим ултанды,
Теңизди көрмедим, көрдим бир сарап,
Сонда сүйген едим шынтлап Ўатанды,
Халықым- шөлде өскен азамат дарақ!

Мен ҳәм перзентимен усы жәннеттиң,
Мен бунда туўылдым киндигим қанап,
Турғыны болсам да басқа бир кенттиң,
Жүрегим шабады өзиңе қарап.

Мениң ана тилим- қарақалпақша,
Аўызымнан түспейсең жүрсем де тарқап,
Қосықтан жаратсам кишкене бағша,
Жасадым деп айтаман Алла жарылқап!

Азимбек Утемуратов