Charjau_Elmuratov

Ҳүрметли муғәллимлер ҳәм устазлар!

Сизлерди 1-октябрь - кәсиплик байрамыңыз бенен шын-жүректен қутлықлайман!

Биз қандай кәсипти ийелемейик, оның бәри-бәриниң сағасында сиз әдиўли кәсип ийелери турасыз. Мектепке шекемги, мектеп жоқары ҳәм билимлендириўдиң ҳәр қандай басқышында бизиң қоллаўшымызсыз!

Халқымызда устаз атаңдай уллы, бир ҳәрип үйреткен устазыңа қырқ жыл сәлем бер, деген даналық сөзлер бийкарға айтылмаған.

Себеби, Сиз бизге ҳәрип үйретип қоймастан, меҳир бердиңиз, дурыс жол көрсеттиңиз, билим-илим менен дүньятанымымызды байыттыңыз. Жәмийетте өз орнымызға ийе болыўымызға, таңлаған кәсибимиздиң маманы болыўға шақырдыңыз. Қәте-кемшиликлеримизди көрсетип, жетискенликлерге ериссек қуўандыңыз ҳәм еле де бизди жақын-алыстан қоллап-қуўатлап келмектесиз!

Әзиз устазлар ! Сизлер ели-халқымыздың раўажланыўы, бүгинги абадан турмыстың тирегисиз! Мектепке шекемги, мектеп, жоқары ҳәм билимлендириўдиң ҳәр қандай басқышында  да бәрҳә тилекшимиз, қоллаўшымызсыз!

Байрам мүнәсибети менен Сиз уллы кәсип ийелерин және бир мәрте қутлықлай отырып, Сизиң ҳәр бириңизге беккем денсаўлық, шаңарақларыңызға аманлық, қут-берекет ҳәм алдағы ийгиликли жумысларыңызда тасқын табыслар тилеймен!

Ҳүрмет пенен, Чаржаўбай Елмуратов

@charjau_elmuratov

Бүгин өзим жумыс ислеп атырған Филиалда Шымбайдың ширели ҳаўазлары – әпсанаўий «Сәўбет» ВИА ның ағзалары – Б.Пирназаров, Т.Қонысбаев, М.Наўрызалиева ҳәм соның ишинде, Ансамблдиң солисти – Бахтыяр аға Исметуллаев пенен ушырасыў бахты несип етти.

Мийманлар Филиал жаслары менен дөретиўшилик сәўбет қурып, С.Исметуллаевтың буннан 30-40 жыллар илгериде дөретилген, бүгинги күнде ретро дәрежесиндеги қосықларды атқарыўы кешениң көркемлигин және де байытты.

Жеке өзим, «Қарақалпақстан», «Шымбай» ҳәм «Гүлнара» қосықларын тыңлап жүдә заўықландым. Буннан тысқары, ҳәзирги күнде Қазақстан Республикасында жасап атырған М.Наўрызалиеваның ВИА репертуарындағы ески ретро қосықларды атқарыўы оның мисли жаслық жылларына, туўылған жерге деген сағынышынан дәрек берди. Соның менен берге, жыйналғанлардың биразын да сол мәўритлерге қайтарды, десем асыра айтпаған боламан.

Ретро сөзин қолланыўымыз тегиннен емес, ВИА атқарған өлмес қосықлар бүгинги күнде де жасап атыр, ҳәтте жас дөретиўшилер тәрепинен тәкирар атқарылып халқымызға және де руўхый суўсын берип атыр. Әҳмийетлиси, «Сәўбет» бираз тәнепистен соң және сахнаға қайтты.

Ушырасыўда бүгинги жас дөретиўшилер, соның ишинде миллий эстрада атқарыўшылығын таңлаған жаслар усы дөретиўшилерден үлги алыўы керек, деген жүдә орынлы пикир-усыныслар билдирилди.

Орны келгенде биз де толғанып, тыныш тура алмадық. Буннан 9 жыл алдын «Сәўбет» ВИА ҳаққында жазылған «Сол гөззал баҳәрим ядыма түсти» атамасындағы мақаламыз себеп, бизге де сөз берилди. Онда топар ҳәм ВИА тәрепинен атқарылған қосықлардың әҳмийети, тартымлылығы ҳаққындағы толғанысларымды жасыра алмадым.

Сүўретте Б.Исметуллаев пенен туңғыш мәрте қол алысып, дийдарласып турған көринисим. Әлбетте, биз еле коп мәрте ушырасамыз, деп ойлайман.

Төменде жоқарыда атап өткен мақалама силтеме қалдырыўды мақул көрдим.



Канал:

https://telegra.ph/KӨJLEK-ЎAҚYYASY-05-08

Көпшилик кәсиплес ҳәм заманласларымыздың сораўларына бола, жоқарыдағы түрк тилиндеги гүрриңниң қарақалпақшасы нәзериңизге усынылмақта

Канал:

Университетти тамамлап, диплом алған улына әкеси 50 жыл алдын ислеп шығарылған «VOLKSWAGEN BEETLE» автомашинасының гилтин берип, былай деди:

– Мине, оқыўыңды айрықша баҳаларға тамамладың. Бул машинаны мен кѳп жыллар алдын сатып алған едим. Анығы, оның ислеп шығарылғанына 50 жылдан асқан. Бирақ, оны саған саўға етиўимнен алдын қала орайындағы автосалонға алып барып, бул машина ушын олар қанша баҳа усыныс ететуғынын билип келиўиңди қәлеймен.

Ул автосаланға барып, әкесиниң жанына келди ҳәм былай деди: «Олар маған кѳлик ушын 10 000 доллар усыныс етти, неге десеңиз машина жүдә гѳнерип кеткен».

Сонда әкеси: «Енди оны ломбардқа апарып кѳрсет, қәне, қаншаға алар екен?»– деди.

Ул ломбардқа барып келип: әкесине машина жүдә гѳнергени ушын ол жердегилер кѳликти 1 000 долларға баҳалағанын айтты.

Әке енди улынан машынаны антиквар автомобиллер ышқыпазлары клубина алып барып, сол жердегилерге кѳрсетиўди сорады. Ул кѳликти сол клубқа айдап барды ҳәм үлкен толғаныс пенен қайтып келип, әкесине:

–Клубтағылар маған машина ушын нақ 100 000 доллар усыныс етти! Олардың айтыўына кѳре, бул кѳлик жүдә бийбаҳа ҳәм коллекционерлер арасында ең кѳп изленип атырған модель екен!

Сонда әке улына былай деди:

– Мен буның менен сени бир ҳақыйқатты түсиниўиңди қәлеп едим: тек дурыс таңланған мәкан, орталық қәдириңе дурыс баҳа бере алады. Егер қай жердедур сени қәдирлемесе, сен буннан ҳасла ғәзепленбе, бул сениң надурыс орталықта екениңниң белгиси. Негизги қуныңды билетуғынлар – бул сени шын-жүректен қәдирлейтуғынлар. Солай екен, ҳеш қашан қәдириңди мойынламайтуғын, тән алмайтуғын орталықта қалып кетпе!

@deputatotemisov телеграм каналынан алынды.

@charjau_elmuratov

ӨЗИМНЕН БАСҚАҒА ӨКПЕ-ГИЙНЕМ ЖОҚ

Ой-қыял жонғысы қәлбимди жонып,
Бахыт қусы гейде басыма қонып,
Ҳақыйқаттай қоллап, шынлықтай болып,
Ҳешким мениң көзлериме тийген жоқ.

Жаздырылып кетти көп өмирим орамы,
Шадлық шуғла шашты, тәшўиш борады,
Мениң бойымдағы менлик сорамы,
Жалған ҳүкимине мойын ийген жоқ.

Бул ҳалатты бастан кешкен биледи,
Үмит оты жанып-өшкен биледи,
Көксинде дәрт сеңи көшкен биледи,
Ҳешким яр ышқында биздей күйген жоқ.

Кисиге қаратлық қылмай күнимди,
Тумашалап өткердим ығбал түнимди,
Дүзетпеген кеўилшеклик минимди,
Өзимнен басқаға өкпе-гийнем жоқ.

Ҳаққа жәбир берсең тутар кийеси,
Бир жағылса кетпес пәслик күйеси,
Елим-журтым жан-тәнимниң ийеси,
Мәгар, ҳешким халқын мендей сүйген жоқ.

Жақсылардың тийди берген дуўасы,
Қосықларым – ким екеним гүўасы,
Шайыр, халықтың ең қайсар, ең жуўасы,
Халил дер: еле көк көйлек кийген жоқ.

Х.Дәўлетназаров

Канал:

https://youtu.be/OHixJcP2zLQ?si=-SoEeY0xQhp3GIUK

Қарақалпақстан халық шайыры Халила Дәўлетназаровтың "Жаслығым сен мени таслап барарсаң" қосығы жасалма интелект атқарыўында

Қосықты жоқарыдағы силтеме арқалы youtube тармағында тыңлаўыңыз мүмкин.

Канал: