КИТАПҚУМАР

✨✨✨

Наның қалың күни ким доспан десе,
Оны ырас сөз деп билиўши болма.
Сен жығылған күни сүйесе келип,
Сол адам ҳақыйқый яр-досың болар.

Саадий Шеразий "Гүлистан" шығармасынан

@kitapqumar_16

Ҳешбир исти кейинге қалдырмаң. Ойланбаң, шубҳаланбаң, мүмкиншилик бар екен ҳәрекет етиң. Сизиң ең үлкен ўазыйпаңыз ҳәрекет етиў.

"Күш" китабынан

@kitapqumar_16

Менде бир сўм бар. Сизде де бир сўм бар... Мен сизге өзимниң пулымды бердим. Сиз де маған өзиңиздиң пулыңызды бердиңиз…
Ҳеш нәрсе өзгермеди. Сизде де бир сўм пул қалды, менде де... Менде жаңа бир пикир бар. Сизде де жаңа пикир бар... Мен сизге жаңа пикиримди айттым. Сиз де маған жаңа пикириңизди айттыңыз…
Сизде де еки пикир пайда болды, менде де…
Ақыллы адам пул алмаспайды. Пикир алмасады.

Ўткир Ҳошимов “Дәптер жийегиндеги жазыўлар”

@kitapqumar_16

Бул нәрселер менде жүз бере баслағаннан кейин китап оқыўды тоқтаттым⚡️⚡️⚡️

1. Досларым менен көп тартысып қалып атырман. Ҳәрбир нәрсениң себеп ҳәм ақыбетин түсиндире берип, олардың нервине тийиў жанға тийди. Әпиўайы ғана надан болып жасаў да бир бахыт екен.

2. Ким қай жерде не жегени, қандай машина алғанын талқылаў орнына, геосиясий мәселелер ямаса тарийхый шахслар ҳаққында сөйлеп орталықтың пайызын бузып атырман.

3. Мени алдаў ҳәм манипуляция қылыў жүдә қыйын болып қалды. Ҳәмме нәрсеге гүман ҳәм логика менен қарайтуғын болдым. Жай ғана исенип, яқшы деп кетеберетуғын әпиўайы күнлеримди сағындым.

4. Адамлар сөйлеп атырған сөзлеримди түсиниўи ушын жанында түсиндирме сөзлик алып жүриўи керек болып атыр. Әпиўайы, көше тилинде сөйлесиўге не жетсин?!

5. Кино ямаса сериал көрип атырғанда сценарийдеги ойсызлықларды тез таўып алып атырман. Мийди өширип қойып, аўызды ашып сериал көриў мүмкин емес болып қалды, сол себепли китапты жыйнастырдым.

6. Уйқыларым бузылды. Түнде тыныш ғана уйқылаўдың орнына, жәмийет қалай қарай кетип баратыр, неге адамлар сонша пассив деп бас қатырып шығып атырман. Ески, ҳеш нәрсени ойланбайтуғын тыныш уйқым керек маған.

7. Социал тармақлардағы сайыз видеоларға күле алмай қалдым. Юмор сезимим соншама өсип кетти, енди маған тек интеллектуаллық ҳәзиллер керек. Сайыз нәрселерден заўық алыў қәбилетимди жоғалттым.

8. Машқалалардың түп тамырын дәрриў көре басладым. Оларды анализ етип отырғаннан көре, көпшиликке уқсап жай турмыстан ҳәм тәғдирден налыў бир қанша қызықлырақ ҳәм аңсатырақ екен тийкарынан.

9. Ең жаманы - бийҳуўда ислерге улыўма ўақтым қалмай атыр. Өйткени қанша трендлерден артта қалып баратырман, тармақлардағы жаңа ерси ойынларды ким көреди енди?!

Дерек: @SIZLER_USHIN

@kitapqumar_16

Атамадағы қәтелик

Атақлы фантастик жазыўшы Рей Брэдбери жаңа романына “Фаренгейт бойынша 451 дәреже” деген ат қояды. Шығарма мазмунынан келип шығып усындай ат сайланған еди. Өйткени әдетте усы температурада қағаз өз-өзинен жанып кетеди. Бирақ қағаз фаренгейт емес, цельсий бойынша 450 дәрежеден сәл артығырақ температурада жанады. Автор ат қойыўда от өшириў хызмети жумысшысы менен мәсләҳәтлескен ҳәм ол температура көрсеткишлерин алжастырғаны ушын жазыўшы да қәтеликке жол қойған.

@kitapqumar_16

Қыялы теңиз жағалаўлары сыяқлы кең ҳәм теңиз ҳаўасы сыяқлы таза адамларды табыў жүдә қыйын болып кетти..

Ги де Мопассан "Әзизим" шығармасынан

@kitapqumar_16

#Балалар_әдебияты

КИТАП АТАНЫҢ АҚЫЛЫ

– Китап ата, сен неге?
Турасаң бәрҳа текшеде?
Ашылмайсаң ҳешқашан,
Үсти-басың аппақ шаң?

Бурынлары столдың,
Туяғында жатар едиң,
Жаз келсе шыбынларды
Сен ɵлтирип атар едиң.

Ағам балық әкелсе,
Жулар едик бетиңди.
Ҳәзир ɵзгерди кɵп нәрсе,
Адамлар да жетилди.

ϴзгерип кетти столлар,
Шыбынға шықты кɵп дәри.
Балық па, таяр турар
Салфетка орамлары.

Тиси кетик атамдай
Қашып кеткен сықылың.
Айтыўға бир адамдай
Жоқ па маған ақылың?

– Тилге кирди Китап ата,
Шамасы, бийтап ата,
– Ишим мениң дүр, балам,
Ашып-ашып кɵр, балам.

– Дүр болсаң неге онда,
Атам ашып кɵрмеген?
Алдына алып апам да,
Сени оқып бермеген?

Әкем сирә бизнесмен,
Сени жаны сүймейди.
Анам үйде… билмеймен,
Бирақ қолы тиймейди.

Оқымаған әжағам да,
Оқымаған әжапам да,
Сени оқыў сол ушын,
Шәрт пе екен маған да?!

– Әй шырағым, қулыным,
Узақ болсын ɵмириң,
Баласы бол да адамның,
Баласы болма атаңның.

Тәрбияңда кемлик бар,
Менде оған емлик бар,
Сыпырып мына қурымды,
Тазарт мениң түримди.

Саған кеўил бɵлмеген,
Әкеңе мени оқып бер,
Телефоннан қолы тиймеген,
Шешеңе мени оқып бер.

Қызықпайды әўели,
Аўыртпа дейди басымды.
Бирақ таслама мени,
Сɵндирме ықласыңды.

Әжағаңды да қызықтыр,
Әжапаңды да қызықтыр,
Бәри сениң қолыңда,
Қайтпа сирә жолыңнан.

Билим баслар бахытқа,
Асық, кара ўақытқа,
ϴзиңе исен, еплейсең,
Билимсизди емлейсең.

– Мақул, мақул, Китап ата,
Болмаң сирә бийтап, ата.
Айтқаныңды қыламыз,
Билимли ел боламыз.

©Аллаяр Дарменов
https://t.me/Allayar_Darmenov

Сыр сениң қулың есапланады.
Оны әшкара етсең, сен оның қулына айланасаң.

Илим үйрениң. Буны еплей алмасаңыз, илим халқын сүйиң. Егер буны да еплей алмасаңыз, ҳеш болмаса алымларды жек көриўден сақланың.

Өмир ҳәдийселеринен сабақ ала билгенлер сабыр-тақатлы болады. Олар сол себепли дүньяның басқалар аңламаған сырларын аңлайды. Өмир ҳешқашан тоқтамайтуғынлығын, дүньяның жақсы-жаман барлық ислери өткинши екенлигин, қуўаныш та, қайғы да мәңги емеслигин түсинип жетеди. Артықша шадлыққа берилиў тәкаббырлық, қатты қайғыға түсиў шүкирсизлик екенлигин ишки бир күш тәсиринде сезеди.

"Ул-қызларыма 1000 нәсият" китабынан

@kitapqumar_16

Өмир лаўлаған от. Оннан қашып қутылыў жоқ, әззилер өртенип күлге айналады, күшлилер шынығып шығады.

Т. Қайыпбергенов "Қарақалпақ қызы" романы

@kitapqumar_16

✨✨✨

Америка Педиатрлары Аўқамы изертлеўлериниң нәтийжесине көре, бала менен ҳәр күни 15 минут даўамында китап оқыўдың пайдалары менен танысың.

Бала мийиниң 90% оның 3 жасына шекем раўажланып болады. Сол дәўирде балаға китап оқыў мий раўажланыўына унамлы тәсир көрсетеди.

Үш жасар баланың сөз байлығына қарап ол 3-класта «оқыў»дан неше баҳа алыўын алдыннан билсе болады.

Күнине 15 минут даўамында балаға китап оқып берилсе, ол 1 жыл даўамында 1 миллионға жақын жаңа сөзди еситкен болады.

Биринши класс китапларын оқый алмаған бала, кейинирек 4-класс китапларын да оқый алмайды.

Мектепке шекемги жастағы балаларға көп китап оқылған болса, олар 1-класқа шекем басқаларға салыстырғанда тезирек әлипбени үйренеди, 20 ға шекем санай алады ҳәм өз атларын жаза алады.

Баланың мектеп жасына шекемги дәўиринде ата-анасы менен китап оқыўы, оны мектеп дәўиринде китапқа қызығыўшылығының асыўына алып келеди.

Жаслығынан китап оқыўға әдетленген балада тил кемшиликлери, сөйлеўде қыйыншылықлар болыўы кем көринетуғын болады.

Оқыў басқалардың сезимлерин түсиниўге жәрдем береди.

Оқыў баланың билимлериниң тийкары.

Китаптан алынған мағлыўмат телевизор, интернет ҳәм радиодағы қабыл етилген мағлыўматтан көре көбирек мийге унамлы тәсир етеди. Оннан тысқары китап оқыў зейинди шарықлап, бала дыққатын бир жерде узақ ўақыт услаў қәбилетин күшейтеди.

Статистиканың көрсетиўинше, мектепке шекемги жастағы балаларға ата-ана китап оқып берсе, китапқа болған қызығыўшылық 100% болады. Төртинши класқа келип китапқа болған қызығыўшылық 54% ке шекем түсип кетеди. Өйткени, бала менен ата-ана бирге оқымаслығында екен.

Китап тили көркем әдебий ҳәм шырайлы. Бул келешекте перзентиңиздиң шырайлы сөйлеўин тәмийинлейди.

Китапты қызығыўшылық пенен балаға оқып бериў, кейинирек онда китапқа меҳир ояныўына алып келеди.

Телевизордағы берилип атырған «сөзлик»тен гөре китапта берилип атырған тексттеги «сөзлик» еки есе көп болып табылады.

Үйде 6-8 жаслы балаларға ата-анасы китап оқып бериў дәўирин балалардың бири китапты жақсы көргенлери ушын хош көрсе, бири ата-анасы менен әжайып ўақыт өткерип атырғанлығы ушын жақсы көрер екен.

Яғный балаға китап оқып бериў ата-аналар ҳәм перзентлер арасындағы меҳир-ақыбетти күшейтиўдиң нәтийжели қуралы да есапланады.

@kitapqumar_16