Минайхан Жуманазарова

КҮНГЕ БАҚҚАН АЙҒАБАҒАРМАН

Туў сыртымнан қадалған көзлер,
Өңменимди тесип өтеди.
Көмейиме тығылған сөзлер,
Баўырымды кәбап етеди.

Күнге баққан айғабағарман,
Запырандай сарғыш жүзлерим.
Есапта жоқ, қорада барман,
Қар астында қалмыш излерим.

Бас кессе де тилди кеспек жоқ,
Бийкар екен тилимди кести.
Емин-еркин енди беспек жоқ,
Ышқысталық ишиме түсти.

Етек-жең көп, жаға таппайман,
Аяқ-қоллар бассыз шабысар.
Атқосшы көп, аға таппайман,
«Сумлар намазшамда табысар».

Туў сыртымнан қадалған көзлер,
Өңменимди тесип өтеди.
Көмейиме тығылған сөзлер,
Баўырымды кәбап етеди.

✍️ Минайхан ЖУМАНАЗАРОВА

Каналымызға ағза болың👇
@Minayxan_Jumanazarovaa

ОРНЫНДА ТУРҒАЙ

Тоқтап қалды ана жер,
Көшеринде айланбай.
Бул дүньяның тәшўиши,
Бир басымда турғандай.
Солды үмит гүллери,
Мисли қыраў шалғандай.
Тәғдирдиң аўыр шөккиши,
Тас төбемнен урғандай.
Түсине алмай дағдардым,
Бул не аўҳал, не жағдай.
Әҳ қудай, деп аҳ урдым,
Әзел өзи оңғарғай.
Бәрин айтта, бирин айт,
Аллам нәзерин салғай.
Әй ығбалым, бери қайт,
Дәртим өткинши болғай.
Ана жер, орнында турғай!...

✍🏻Минайхан ЖУМАНАЗАРОВА

Каналымызға ағза болың
@Minayxan_Jumanazarovaa

БОЛМАС

Заман курсын шыдағанға шығарған,
Кимди көрсең кеўилинде мың әрман,
Жетпесинлик қашшан көшин туўарған,
Көзим көргенлерин айтпасам болмас.

Елим деген ердиң түсти ийини,
Шеше алмай ҳеш бир истиң түйинин,
Ишерге асы жоқ, жыртық кийими,
Кеўил әндийшемди сөтпесем болмас.

«Бирин» берип алған болар кеўлинди,
Бири алып кетер соңыра жүзиңди,
Шанашта ун жоқ, телек түби көринди,
Тилимди кессе де айтпасам болмас.

Майлы кемик болса кимниң қолында,
Басшың, қосшың бәри соның жолында,
Бир қалта ун бермес намыс-арыңа,
Күйгеннен күй шығар, шертпесем болмас.

Ғәрезсизлик бизиң ушын түс болды,
Бастан ушып кеткен дәўлет қус болды,
Үмитим, әрманым бәри пуш болды,
Түн пердесин тилип сөтпесем болмас.

Баяғы бағлары енип тусине,
Булбилдиң пығаны түсти ишине,
Заман гәрдиши ме, пәлек иси ме,
Кеўлим қанға толды, төкпесем болмас.

Заман курсын шыдағанға шығарған,
Кимди көрсең кеўилинде мың әрман,
Айттым-айтпадым не, жоқ буннан дәрман,
Сонда да дәртимди төкпесем болмас.

✍🏻Минайхан ЖУМАНАЗАРОВА

Каналымызға ағза болың
@Minayxan_Jumanazarovaa

ҚӘСТЕРЛЕП САҚЛАҢЛАР БИР-БИРИҢИЗДИ

Ҳасылдың қыяғы, тулпар туяғы,
Бәриңиз ақыллы, бәриң зыялы.
Әй, әзиз халқымның әзиз уллары,
Қәстерлеп сақлаңлар, бир-бириңизди.

Бул жерге келгениң теңизден тамшы,
Бабамыз әзелден көп жеген қамшы,
Дүнья өткиншидур, дүнья ялғаншы,
Қәстерлеп сақлаңлар бир-бириңизди.

Мен, мен деп көкирек кере бермеңлер,
Әзәзул, шуғыллық сөзге ермеңлер,
Ҳасла абырайды қолдан бермеңлер,
Қәстерлеп сақлаңлар бир-бириңизди.

Батырсаң, сендағы, сен де батырсаң,
Халқыңа хызметти етип атырсаң,
Жәмлессең бириңиз, мыңға татырсаң,
Қәстерлеп сақлаңлар бир-бириңизди.

Күншиллик не теңиң кимди күнлейсең,
Өз иниң, өз ағаң кимди жерлейсең?
Әзел ҳақдур, енди қайта келмейсең,
Қәстерлеп сақлаңлар бир-бириңизди.

Шайырсаң бәриң де елди жырласаң,
Данышпансыз ели-журтты сыйласаң,
Келешек әўладтың ғамын ойласаң,
Қәстерлеп сақлаңлар бир-бириңизди.

Көп емес дүньяда, қарақалпақ аз,
Сол ушын көксиңди қаға берме-жаз,
Ҳәр бириң ушыға, ҳәр бириң алмаз,
Қәстерлеп сақлаңлар бир-бириңизди.

Өзинди шер билсең, басқаны зор бил,
Ҳәмме де өзиңдей, өзиңе тең бил,
Бәри де сен киби, мийнеткеш себил,
Қәстерлеп сақлаңлар бир-бириңизди.

Бириңиз гәўҳарсыз, бириңиз дүрсиз,
Дүньяда теңи жоқ, ҳақыйқый ерсиз,
Жасамақ мүшкилдур бириң-бириңсиз,
Қәстерлеп сақлаңлар бир-бириңизди.

Тамырында аққан қан, геўдеңдеги жан,
Бәриң де бир текли дин ҳәм де ийман,
Сизлер қаналассыз буған жоқ гүман,
Қәстерлеп сақлаңлар бир-бириңизди.

Көп емес дүньяда, қарақалпақ аз,
Сол ушын көксиңди қаға бермес-жаз,
Ҳәр бириң ушыға, ҳәр бириң алмаз,
Қәстерлеп сақлаңлар бир-бириңизди.

✍🏻Минайхан ЖУМАНАЗАРОВА

Каналымызға ағза болың
@Minayxan_Jumanazarovaa

Тәбият жыласа…
Жолбарыс журекли батыр ең,
Бир өзиң мыңга татыр ең.
Ҳалықыңның ғамын ойлаған,
Ел ушын тууган шайыр ең.
Дәртине дәрман излесе,
Ҳалкың сени жоқлайды.
Мәусимлер келсе избе из,
Тәбият жойтып жылайды.
Бәҳәр келсе селлетип,
Жазы келер куйдирип,
Гузде қазан жапырақлар,
Қар астында туншығар.
Ҳәтте пасыллар төзбейди,
Өз жыршысын излейди,
Асқар таулар қулазып,
Булақ сууына шөллейди.
Ана тәбият, ана жер,
Өз баурына алдыма,
Жаны төзбей пасыллар,
Өз жайына қалдыма…

Р. Бердимуратова         2019 20-июль

Жасалма интеллект арқалы исленген

Ана
Сағынышым сарғайып,
Жапырақлары үзилди.
Изле-излей өзиңди.
Журек баурым езилди.
Келердейсең айланып,
Жолларыңа көзим төрт.
Өшпес дәртке байланып,
Жүрегимде лаулар өрт.
Қулыным деген даусыңнан,
Айланып ғана кетейин,
Дизеңе басым қойыуға,
Барымды сарп етейин
Шеги жоқ жырым өзинсен,
Сен мениң қарар көзимсең.
Жолларыма төгилген,
Үзилген лала гулимсең…

Р. Бердимуратова 2019  сентябрь