Нәбийра Төрешова

"ÁMIW ÍRǴAQLARÍ" 02-10-2026
https://youtube.com/watch?v=JrzdMPqT4GY&si=AYLUoCx0hJlavYSn

УСТАЗ
«Дүньяда ең уллы, ең азиз» инсан,
Жүреклери қуяш өзиңиз устаз.
Жыйып жақсылықтың урығын мың сан,
Перзентлерге берген өзиңиз устаз.

Анамдай меҳрийбан, атамдай уллы,
Жүзлери нәўбәҳәр, периште сынлы,
Алақанда тутқан, ҳәр бир қыз, улды,
Кеўиллери дәрья өзиңиз устаз.

Ақ пахтадай жас кеўилге нур егип,
Билим берип өмирине гүл егип,
Сол гүллери ҳәр жыл сайын түрленип,
Дүньяны жасартқан өзиңиз устаз.

Ким болса да мына дүнья үстини,
Қолыңнан пишилген оның үшкили,
Ақыл-ойға қуйған зия ушқыны,
Елди нурға көмген өзиңиз устаз.

Сениң мийнетиңдей аўыр мийнет жоқ,
Сениң қүдиретиңдей уллы қүдирет жоқ,
Сени ҳүрметлеўден артық ҳүрмет жоқ,
Жыйынның саўлаты өзиңиз устаз.

Бүгинги жаслардың адымы алық,
Билимге умтылар от болып жанып,
Оларға барқулла туўры жол салып,
Дойнаққа күш берген өзиңиз устаз.

Талай жарыслардың болып сейиси,
Өзиң—арқаў, шәкирт болып ериси,
Қолға тийип мийнетлердиң жемиси,
Абырайларға ийе болғансыз устаз.

Елим ушын хызметиңниң шеги жоқ,
Излениўлер мийнетиңниң кеми жоқ,
Қос байрам көз айдын, табыс болсын көп,
Пидайы, уллы инсан өзиңиз устаз!

"Мәңгилик қосығымсаң" топламынан
Нәбийра Төрешова
Қарақалпақстан халық шайыры

🌷Каналымызды бақлап барыўда даўам етиң, каналымыз силтемесин тарқатыўда өз үлесиңизди қосың 👇👇👇👇👇

👉https://t.me/toreshova_nabiyra

Оҳ, жаным, сүйемен, делбе болып сени соншелли,
Тилим барып, бирақ ҳеш, мен буны айта алмайман.
Меҳирим бар, жәҳәндеги бәрше ағла нур шелли,
Жүрегиңе нур ал деп, бирақ саған айта алмайман.

Тек қарайман жолыңа, оны-буны бәне етип,
Жүрек етип бир аўыз сөзди ҳеш айта алмайман.
Жорта ғана бир қызды саған таңып, сыр тартып,
Сен ҳаққында сорайман, кеўлимди айта алмайман.

Жулдызымыз дус келип, несип болса ықласың,
Меннен бахытлы адам жоқ, сөз таўып айта алмайман.
Жырақ түссе жолларың өзге жанан бахтына,
Меннен кеўил ойран жоқ, сөз таўып айта алмайман.

Бирақ қайда жүрсең де мәртебеңди тилеймен,
"Тилеклеспен саған" деп, бирақ, ҳеш айта алмайман.

"Өзиңнен" қосықлар топламынан
Нәбийра Төрешова
Қарақалпақстан халық шайыры

🌷Каналымызды бақлап барыўда даўам етиң, каналымыз силтемесин тарқатыўда өз үлесиңизди қосың 👇👇👇👇👇

👉

Нәбийра Төрешова
Қарақалпақстан халық шайыры

БИР КҮН ТӘРИЙПИ

Жулдыз қонған қара үйиңниң,
Қапыларын әсте ашты таң.
Тарқатып пәк ҳүрлер жыйынын,
Тириликти оятты бийғам.

Көгис тартты түнниң көрпеси,
Аппақ нурдан қуслар оянды.
Алғыслады таңды бәршеси,
Тәбият мың түрге боялды.

Қора жаққа адымлар келин,
Сыйыр саўар азанғы шайға.
Дастурханның келтирер сәнин,
Жасы үлкен, кишкентайларға.

Оқыўына асығар баллар,
Жумысына асығар үлкен.
Сағынғандай ийилер таллар,
Гүжимлердиң қәўмети көркем.

Пал бөбеклер–бақшаның көрки,
Билим толы мектеп қушағы.
Талаплыға табылар гилти,
Устаз сөзи–алтын усағы.

Студентлер оқыў орнында,
Сөйлетеди өтмиш-бүгинди.
Елди көркейтиўдиң жолында,
Күшли қурал етпек илимди.

Халық ырысқы–аппақ бийдайлар,
Толтырады елдиң телегин.
Элитадан үйип қырманлар,
Салыкешлер жоллар сәлемин.

Бир қапталда "ақ алтын" таўы,
Мамықлығы жүрегимиздей.
Бағымыздың алма, әнары,
Уўылжыйды тилегимиздей.

Жумыртаўдан алтынлар өнип,
Қаратаўым гранит сыйлар.
Бүгинги күн несийбин терип,
Ақ отаўда басланар тойлар.

Келин-күйеў–бир жуп қарылғаш.
Зыяратлар қутлы жайларды.
Ақ көйлекте ойнайды қуяш,
Қутлықлап ол аппақ айларды.

Сыңқ-сыңқ күлип суўлар ағысар,
Ана Аралына бой таслап.
Суңқар палапанын ушырар,
Жол көрсетип бағдарын нусқап.

Себеп оның жалғыз тилеги,
Ана журттың абат болыўы.
Жутып қоймай дәўир елеги,
Аралына куўлар қоныўы.

Баўыры кең алапларымда,
Гүл, гүлзарлар ашылар шешек.
Туўыў үйи ханаларында,
Туўылмақта жарқын келешек.

Бул үлкемде байрам, тойлар көп,
Бүгин соның және бириси.
Бас байраққа умтылады Көк.
Қыйқыўласар үлкен-кишиси.

Ҳәр бир көзде парлар қуўаныш,
Өзи түскен киби бәйгиге.
Абырай ушын қызар атланыс,
Айланады халық сейилине.

🌷"Мәңгилик қосығымсаң" топламынан

👉Каналымызға ағза болың,
👉Каналымызды гүзетип барыўда даўам етиң 👇👇👇👇👇

👉https://t.me/toreshova_nabiyra