КЕЎИЛ ЕСИГИ

Búgin 15-may xalıqaralıq Shańaraq kúni. Usı sáne múnásibeti menen universitetimizde ótkerilgen "Kelin-kúyew" tańlawına ómirlik joldasım menen qatnasıp 1-orınǵa ılayıq dep tabıldıq. Bunnan júdá quwanıshlımız. 2014-jıl turmıs qurǵan edik. Bıyıl 10 jıl tolıp atır. Jeńimpazlıq bolsa kútilmegen sawǵa boldı. Hámmeniń shańaraǵına amanlıq, awızbirshilik, mol nesiybe hám tatıwlıq joldas bolǵay!

ÓMIR ÓTIP BARATÍR

Keshe bala edik, búgin anamız,
Birewge aq, al birewge qaramız,
Balalıqtan alıslasıp aramız,
Ómir ótip baratır.

Ańlaw menen túrli-túrli uǵımdı,
Erteń ushın qural etip búgindi,
Kalendardan julıp alıp kúnimdi,
Ómir ótip baratır.

Kimdidur kewilge jaqınlaw alıp,
Jáne kimlerdendur kewlimiz qalıp,
Jaqsını, jamandı kózimiz tanıp,
Ómir ótip baratır.

Gózlegen niyet hám maqset jolında,
Túrli insanlardıń túrli tobında,
Turmıstıń pás-bálent, ońlı-solında,
Ómir ótip baratır.

Qátelerden tawıp durıs sheshimdi,
Ele de bayıtıp aqıl-esimdi,
Háp zamatta tańǵa jalǵap keshimdi,
Ómir ótip baratır.

Arasında kewilimiz qamıǵıp,
Ótken kúndi yad alamız saǵınıp,
Jańa kúnniń esigi tez qaǵılıp,
Ómir ótip baratır.

Bazıda jılasaq, bazda jubanıp,
Dúnya imtixanlarında sınalıp,
Kún, ay, jıllar bir-birine quralıp,
Ómir ótip baratır.

Nurjamal Karamatdinova
31.03.2024

ӨЗБЕТИНШЕ ОЙЛАР

Тоймайсаң ҳеш ҳүр өмирдиң шырайына,
Қарсы шығалмайсаң оның ырайына,
Безалмайсаң, бездирмейди ол өзинен,
Қайта сени ашық қылар удайына.

Қапа болсаң, қуўантқысы келип турар,
Көз жасыңа нәзик кеўли ерип турар,
Өз қолыңа тапсырады өмир өзин,
Сөйтсе де бәрибир сени жеңип турар.

Болар оның сыйлығы да, жазасы да,
Тек той емес, бар емеспе азасы да,
Умытпайды жылағанды жубатыўды,
Бәлким сонда шығар оның мазасы да.

Бийнесип емеспиз, шүкир, шырайыңнан,
Шәмензарға басла алып ылайыңнан,
Зар қылмаған сениң көркем келбетиңе,
Минетдарман, миннетдарман Қудайымнан!

Өмир жалғыз, оның сансыз ийеси бар,
Ҳәркимниң өз ҳақы ҳәм өз үлеси бар,
Ең зорына, ең көбине жетиў ушын,
Соған жараса өмирдиң гүреси бар!

Гүреслерден өткеймиз-дә жығылмастан!!!

Н.Караматдинова
11.06.2023

ЖҮРЕКТИҢ ЖАЛЫНЫШЫ

Жүрегимнен мен ҳәммени қуўып шықтым,
Бөлмелерин бирим-бирим жуўып шықтым,
Қаңырап қалған жүрегимнен өзиме де,
Орын болмай жалғызлықтан суўып шықтым.

Қалтырадым, тилерим де сақылдап тур,
Муз алақан гәплеримди мақуллап тур,
Өзиме де жай таппаған жүрегимниң,
Даўысы да геўек болып тақылдап тур.

Қыяллары қыялыма қаслық қылар,
Өз пикирин пикириме баслық қылар,
Ой-қыялым өз-өзиме жеткиликли,
Жан бармекен бийлик емес дослық қылар?!

Н.Караматдинова
9.06.2023

ТАҢ МЕНЕН ТҮН БИЙХАБАР

Жүзлериме телмиреди таң,
Сыр алғысы келер көзимнен.
Түн тым-тырыс болады жалтаң,
Сес-себир жоқ бирақ өзимнен.

Ай аңлыйды айна артынан,
Бәрин, бәрин сезип турыппан.
Айбыныўшы дода халқынан,
Сезимлер де барын умытпаң!

Ҳәр кеўилде көмилип жатқан,
Бар емес пе айталмас гәплер?
Жалғыз өзиң ашшысын татқан,
Бар шығар-аў айталмас дәртлер!

Таң да, түн де бәри бийхабар?

Н.Караматдинова
30.05.2023

Нуржамал Караматдиноваға қутлықлаў.

Гөззал қызы ҳаслы Қостамғалының,
Тәрийпине тил әззи жамалының,
Тоқполат қәндекли дейди дайысы,
Зор журналист қызы өз заманының.

Гүлайымның батырлығы қанында,
Тумаристиң парасаты аңында,
Шешенликтен басқада көп өнери,
Санайбериң түр түри бар жанында.

Шынқобызы бар қусайды айтқандай,
Шертсе болар Арал толып қайтқандай,
Шет тилинде оқып С1 алажақ,
Буннан артық талант болар айт қандай?

Қарындасым он жас киши өзимнен,
Бир айтысып аңлап алдым сөзинен.
Байрамында мениң тилер тилегим,
Қуўаныш ҳеш тәрк етпесин өзинен.

Тилегим көп нөсер болып жаўғандай,
Әўмет берсин узақларға шаўғандай,
Қуўанғаймыз табысларың еситип,
Қара жерден жети қоян таўғандай.

Ҳүрмет пенен Кеунимжай Мамбетниязов
08.03.2023-жыл.

АНА ТИЛ ТОЛҒАНЫСЛАРЫ

Артып бара берсе "тәдбир"лер,
Тилимиздиң кийими кирлер.
Биз "есе" қол шаппатлап жүрсек,
Жуўады сол кийимди кимлер?!

Бул гәпиме "асас"  бар мениң,
Дәрти "маблағ" ҳәзир ҳәммениң,
Бас қосып, болып бизге "ҳамкар"
Қай "ташкилат" берер жәрдемин?!

Минекей, сизлерге "тақдимат",
Тилин хорлаў - бул не деген уят?!
Таңлаў болды деймиз "ҳаққаный"
"Намзат"лар көп бәринен зият.

Өзимизше болып "мустақыл"
"Масапа"дан өткермеймиз қыл,
Сонлықтан да ҳәр түрли сөзлер,
Үйимизде дым еркинсип жүр.

Бизде туўысқаны жоқ сөзге,
Илажсыз беремиз баспана.
Сөзлик үйде баўыры көп сөзге,
Жатып алың демең дастана!

Н.КАРАМАТДИНОВА
1.12.2022

ЖҮРЕККЕ ЖОЛ

Қыйыр-шыйыр ҳәзир кеўил жоллары,
Биреўге қарасаң, биреўге ақсаң.
Аңсат нәрсе емес турған қолдағы,
Бирине жақпайсаң, бирине жақсаң.

Базылар мүлайым, базылар қопал,
Шоршытар кеўлиниң есигин қақсаң.
Әтирапыңда жүрген адамлар көп, ал,
Адамгершиликти, қәнекей, тапсаң!

Н.Караматдинова
27.11.2022